Kamakailan lang ay nahumaling na rin ako sa pagkuha ng mga mukha ng tao. Bagamat ako'y nangangapa pa sa ganitong genre dahil sa limitado kong karanasan, masaya ako dahil sa bawat taong kinukuhanan ko, natututo ako ng mga bagong teknik sa pagkuha at pag-direk sa aking mga modelo ngunit sa lahat, mas nakikilala ko sila. 

Isa sa mga natutunan ko sa genre na ito ay ang kahalagahan ng pagkilala sa iyong modelo bago mo sila kuhanan. Hindi sapat ang kagalingan nila sa pag-anggulo ng kanilang mukha at katawan. Kakabit dapat nito ay ang pagintindi sa kanilang emosyon at sa kuwentong gusto nilang isalaysay.